1. Тарвасны хайлмаг
Үр болон хальснаас нь салгаж, цэвэрлэсэн тарвас л байхад хангалттай.
Хийх дараалал:
Тарвасаа блендерт хийж жижиглээд аяганд эсвэл мөхөөлдөсний хэвэнд хийж хөлдөөнө. Ингээд л аагим халуун өдөр бага зэрэг гэсгээгээд, халбагаар бутлаж байгаад идээрэй. Ингэж идэхэд амны цангааг тайлахаас гадна сайхан амтыг мэдрүүлнэ.

2. Манго, гүзээлзгэнэтэй цас
Орц:
- Мөс
- 2 ш хальслаж, хэрчсэн манго
- 500 гр хальслаж, хэрчсэн гүзээлзгэнэ
- 1 ш лайм (чимэглэхэд хэрэглэх болохоор байхгүй ч байж болно)
Хийх дараалал:
Мөсөө блендерт хийж жижиглэн, яг л цас шиг хөвсгөр болгоорой. Дээр нь нэмээд манго болон гүзээлзгэнээ хийгээд дахин блендрээрээ холино. Ингээд л бэлэн болсон амтат цасаа аягалаад хэрчсэн лаймаараа чимэглээрэй. Хялбархан байгаа биз?

3. Тарвас, гүзээлзгэнэтэй сангриа (Алкогольтой болохоор томчуудад тохиромжтой)
Орц: 8-10 хүн
- 1 ш жижгэвтэр тарвас
- 450 гр гүзээлзгэнэ
- 1 шил Rose wine
- 1 аяга цагаан архи
- 1 аяга шинэхэн жүржийн шүүс
- ½ аяга жүржийн Ликёр
- 1 ш жүрж
- 1ш лайм
Хийх дараалал:
Тарвас болон гүзээлзгэнээ блендертээ хийж сайтар холино. Дээрээс нь цагаан архиа нэмээд том саванд хийж тавина. Дээр нь нь rose wine, жүржийн шүүс, ликёроо хийж бүрэн холилдтол нь хутгана. Сайтар холиод дээр нь хэрчиж бэлдсэн лайм, жүржээ хийж таглаад хөргөгчинд хийгээд хонуулаарай. Хамгийн сүүлд нь уухдаа мөс, бага зэргийн гүзээлзгэнээр чимэглэхэд болно.