Сайн байна уу?
Та бүхэндээ энэ өдрийн мэндийг хүргэе. Гоолингоод хандаж сэтгэлээ нээн, зөвлөгөө авахаар шийдээд захидал бичиж сууна. Миний бие нөхөр охинтойгоо гурвуулаа амьдардаг энгийн л нэг эмэгтэй. Нөхөртэйгээ оюутан байхдаа үерхэж дотносоод гэрлэж, хөөрхөн охинтой болсон.
Нөхөр маань уг нь халамжтай сайн хүн. Гэм нь жаахан хэнэггүй, хайнга. Энэ зан нь миний жижигхэн зүйлд ч анхаарал хандуулж, ач холбогдол өгдөг зантай байнга зөрчилдөж, маргалдахад хүргэдэг. Анх нөхрөө хардана гэдгийг мэддэггүй байлаа. Гэтэл нөхөр маань хааяа хааяа надад хэлэлгүйгээр хаа нэг газар байж байгаад ирдэг, Асуухаар найзындаа кино үзэх юмуу, дэмий байж байгаад ирсэн гэдэг байв. Үүнд нь би ч нэг их юм бодолгүй “Хэнэггүй болохоороо л ингэдэг юм байна” гэж боддог байлаа. Сүүлдээ энэ байдал нь ихсэж, надад бүр худлаа хэлдэг болов. Гэхдээ намайг хуурсан шинж тэмдэг мэдэгддэггүй, Өөрөө ч ам өчигөө өгч тэгж хэлдэг байсан болохоор би уучилдаг байлаа. Хэдий тийм боловч аажим аажмаар тэр хүнд итгэх итгэл минь багасч жаахан зүйл дээр хүртэл шал дэмий нөхрөө хардаж зовоох болов. Гэсэн ч нөхөр маань намайг хуураагүй, хуурахгүй гэж үнэн сэтгэлээсээ хэлдэг. Би наанаа хардаж зовоож байгаа ч, дотроо арай ч тийм юм хийхгүй байх гэж итгэдэг.
Гэтэл саяхан хэд хоног хол байж байгаад ирээд нөхрийнхөө мээсэжүүдийг үзэж байтал "Hi hedii hemjeenii S heregtei ve" гэсэн мессеж байлаа. Би шууд л уурлаад энэ юу юм? гэсэн чинь юу ч хэлж чадахгүй байж байснаа утсаа булааж аваад устгачихсан. Би харангуутаа тэвчиж чадалгүй шууд уурлачихсан болохоор дараагийн мээсэж, ямар дугаар руу явуулсныг нь харж чадалгүй булаалгачихсан. Тэгээд шахаж шаардсаар байгаад хэлүүлсэн чинь намайг өөр газар байхад интернэтээр эротик өгүүллэг уншсан юм байх. Тэгээд уншиж байхад нь хажууд нь тийм зар харагдахаар нь сонирхоод мээсэж бичсэн гэнэ. Өөр мээсэж ирээгүй, хариу ч ирээгүй гэж хэлсэн. Тэгээд 7 жил үнэнч явсан хугацааг нэг тэнэг мээсэжнээс болоод буруугаар бодож болохгүй гэж хэлсэн. Үүнийг юу гэж ойлгох вэ? Намайг хуураагүй байлаа ч арай ч ингэнэ гэж бодоогүй болохоор би маш их гомдож байна. Хуурсан байвал яана аа гэсэн айдас бас сэтгэлийг минь шаналгаж байна. Үүнээс өөр юу ч мэдэхгүй болохоор яахаа ч мэдэхгүй байна. Би одоо яах ёстой вэ? Та бүхэн минь зөвлөгөө өгч туслаач!
Редакцийн зурвас:
Өөрийн амьдрал дахь шийдэж чадахгүй байгаа асуултандаа тохирсон хариулт эрж, бидэнд захидал бичин илгээдгийг чинь мэднэ ээ. Гэхдээ чиний хэнээс ч асуулгүйгээр шийдсэн шийдэл ч зөвлөмж зөвлөгөө болж, дотроос чинь гэрэлтэх аз жаргал онлайн найзуудад чинь эрч хүч болж бас нөхрийн чинь жижигхэн хэрнээ хайрыг чинь татдаг зан чанар сайтыг маань нууцхан уншдаг залууст үлгэрлэл болж чадна гэж бодож байсан уу? Найз бүсгүйчүүдийнхээ таарамжгүй байдлыг хэрхэн эвдэж нэгтгэсэн, мөрөөдлийнхөө төлөө өөрийн гараар бүтээсэн боломж чинь, хайрттайгаа хэрхэн гэр бүлээ төлөвлөж байгаа чинь ч гэсэн олон хүнд мэдлэг, урам зориг бэлэглэж чадна. Тийм болохоор өөрийнхөө туршлага, амжилт, амьдралыг бага гэж гололгүйгээр сайн сайхан түүхээ бидэнтэй хуваалцаарай. Илгээх хаяг Goolingoo@gmail.com шүү. Гоолингоо нь чиний урам зоригийг түгээх гүүр нь болж өгье. Чиний Гоолингоо ХОХО.